Tulang di Pambalentayms

Paborito kong manunula sa wikang Filipino ay si Pete Lacaba.  Ang mga tula nya, simple, may sense of humor at minsan palaban. Eto ang sample ng kanyang dalawang tula:  Ganito ang pagkain ng paksiw na ayungin:

PAANO KUMAIN NG PAKSIW NA AYUNGIN

Bunutin ang palikpik

(para sa pusa iyan at ang natirang tinik),

At ilapat sa labi ang ulo at sipsipin

Ang mga matang dilat;

Pagkatapos ay mismong

Ang ulo ang sipsip

Hanggang sa maubos ang katas nito.

Saka mo

Umpisahan ang laman.

Unti-unti lang, dahan-dahan at

Simutin ng husto-kakaunti iyang ulam natin,

Mahirap humagilap ng ulam.

Damihan mo ang kanin,

Paglawain sa sabaw.

At huwag kang maangal.

Pyat man ang ayungin,

Pabigat din sa tiyan.

MGA TULANG KALYE

Ang laki sa layaw

karaniwa'y hubad-

mabuti pa si Tarzan

me konting bahag.

Si Donya Rosario,

mas lalong mabuti-

ang lahat ng terno,

tadtad ng brilyante.

Konting bato,

konting semento-

monumento!

Pero walang umento,

walang memento

si Karyong Kantero.

Jhon and Marsha

sa Amerika-

kaya ikaw, Jhon

magsumikap ka!

Juan at Maria

diyan sa pabrika-

magsumikap man,

aasenso ba?

Ako'y tutula,

makatang makata.

Ako,y sisinghot,

benteng kulangot.

Ito'y babala

ng dalitang-dalita-

ang wala kahit kusing

kakapit sa patalim.

One two

One two three

One two three four

let's go!

Yelo,

malamig-

pag natunaw,

tubig!

Tingting,

manipis-

pag binigklis,

walis!

Piyon,

patapon-

pag nagtipon,

unyon!

Mangmang

ay bulag-

pag namulat,

kidlat!

Dukha'y

tahimik-

pag nagalit,

lintik!

Bayang

busabos-

pag kumilos,

unos!